BUTUAN CITY – Gibalik na sa Veterans Memorial Medical Center kon VMMC si Office of the Vice President Chief Of Staff Atty. Zuleika Lopez gikan sa St. Luke’s Medical Center human sa gipagawas nga transfer order gikan sa House of Representatives.
Atol sa nasangpit nga pagbalhin, gibasa ni PBGeneral Nicolas Torrre III, hepe sa Criminal Investigation and Detection, ang kamanduan nga ibalhin ang abogada sa nasampit nga ospital human kini nakarekober na matud pa gikan sa iyahang sakit, subay sa pagsuka-suka niini ingon man pagkalipong samtang anaa sa detention facility sa Kamara.
Gibasa sa ni Torre ang maong kamanduan atubangan mismo ni Bise Presidente Sara Duterte ingon man ni Senador Bato dela Rosa nga ning duyog kang Lopez.
Una nang gidala si Lopez sa VMMC kagahapon sa buntag ug gikatakdang ibalhin sa Correctional Institution for Women (CIW) gikan sa House of Representatives detention facility human kini gi “Contempt” sa Kongreso atul sa hearing kabahin sa intelligence fund tungod matud pa sa pagbabag niini sa nahisgutang imbistigasyon.
Subay niini, gireklamo usab ni Lopez ingon man sa nangabogar niining si Bise Presidente Sara ang hulga matud pa sa kinabuhi sa maong Chief Of Staff tungod sa pag transfer niini gikan sa House Facility ngadto sa balay-tambalanan sa tunga-tunga sa gabie.
Gidala si Lopez sa St. Luke’s Medical Center alang sa dugang obserbasyon gikan sa VMMC apan gibalik ra kini sa naulahing balay-tambalanan pagka-hapon.
