BUTUAN CITY – Pito ka mga tawo ang kumpirmadong patay sa engkwentro tali sa military forces ug usa ka grupo nga gipangunahan nila Captain Tamano Argasi, Commander Paradise, ug Commander Macmod didto sa Barangay Tagudtungan, Bongo Island, Parang, Maguindanao del Norte.
Sigon sa Police Regional Office Bangsamoro Autonomous Region (PRO-BAR), naglusad ang Marine Battalion Landing Team 2 ug ang 65th Force Reconnaissance Company og Maritime Security Patrol kon MarSecPat uban sa pakig-alayon sa ilang pwersa human nakadawat og mga reports kalabot sa mga armadong lalaki sa ilang sa dapit.
Naka-abot gilayon ang Philippine Marines, sakay sa Small Unit Riverine Craft (SURC), sa Barangay Tagudtungan diin sila gipamusil sa mga gidudahang membro sa grupo ni Commander Paradise resulta sa engkwentro.
Sakay matud pa sa 12 ka mga motorized boats ang mga armado atol sa engkwentro. Sigon sa Armed Forces of the Philippines (AFP), pito ka mga sakop sa armadong grupo ang patay kondiin tulo ka mga patay’ng lawas ang narekober samtang nahulog sa dagat ang upat apan narekober na. Narekober usab sa militar ang nagkada-iyang armas ug mga bala.
Usa ka Philippine Marine ang angol apan nakarekober na ug padayong nagpa-alim sa ospital.
