BUTUAN CITY – Gikumpirma ni Lt. Jade Bryce Buñe, ang Civil Military Operations kon CMO offier sa 29th Infantry ‘Matatag’ Battalion, Philippine Army, nga usa ka rebeldeng New People’s Army ang patay samtang narekober usab ang usa ka AK-47 rifle human ang engkwentro tali kanila ug sa mga sundalo pasado alas-dose kaganinang tunghang gabii sa Brgy. De Oro ning siyudad sa Butuan.
Sigon sa opisyal, resulta kini sa upat ka sunod-sunod na nilang engkwentro nga nagsugod niadtong Agusto 19 sa Brgy. Salvacion ning siyudad nga gisundan sa may Brgy. Sta. Maria ingon man sa Brgy. Tabon-Tabon sa lungsod sa Sibagat, Agusan del Sur dayon kagabii.
Gibutyag sa opisyal nga ilang gisundan-sundan ang maong grupo human nakadawat og impormasyon nga anaa matud pa sa maong grupo ang secretary sa Northeastern Mindanao Regional Committee nga si Myrna Solarte kinsa mas naila sa bansag nga Ka Maria Malaya.
Nakumpirma matud pa sa ilang tropa nga ka-uban sa maong grupo si Ka Maria Malaya tungod kay duna’y nakakita kang alyas Jacob nga maoy close-in bodyguard sa maong opisyal atol sa unang engkwentro sa Brgy. Salvacion ning siyudad.
Ang nasangpit nga grupo, gisagop matud pa ni Arnel Banguez kon alyas Dindo nga naglihok sa kabuira ning siyudad sa Butuan ug gibana-banang anaa sa 23 ang ilang gidaghanon.
Gipahimutang na sa usa kapunerarya ning siyudad sa Butuan ang patay’ng lawas sa rebelde nga padayon pang gi-ila pinaagi sa mga kanhi niini ka-ubanan nga nanurender na sa sabakan sa balaud.
