BUTUAN CITY – Nagkadaiyang mga war materials kauban ang suplay sa pagkaon og mga tag-as nga kalibre sa armas ang nakumpiska sa tropa sa 65th Infantry Battalion ilalom sa operational control sa 901st Infantry Brigade atol sa focused military operation sa nakalabay nga mga adlaw dinhe sa rehiyon sa Caraga.
Gilusad sa tropa ang focused military operation sa langub sa may Purok 6, Brgy. Kolambogan, Sibagat, Agusan del Sur diin nakaplagan ang daghang bala sa M16 Rifle, M14 Rifle, Cal. 30mm Garand Rifle lakip na ang Hand Fragmentation Grenade, Rifle Grenades, 40mm M203 Grenade, Blasting Cap og Detonating Wire alang sa Anti-Personnel Mine (APM) og uban pang war materials.
Ang pagkadiskubre sa maong mga bala natigayon human ang Special Intelligence Operations sa 65IB niadtong Mayo 21 nakakumpiska sa food cache sa ‘Pinaminahan’ area sa samang barangay human gitug-an sa usa ka concerned citizen ang mahitungod sa supply facilitation sa CPP-NPA Terrorists nga iya sa miyembro sa SRSDG Westland, SRC Westland.
Samtang ang Special Recon Team, nga ilalom usab sa operational control sa 901st Infantry Brigade nakakumpiska sa usa ka M16 Rifle, bandoliers og mga magazines human ang 20-minutos nga encounter batuk sa mga miyembro sa Regional Headquarters, NEMRC sa Brgy. Camayahan, Butuan City, Agusan del Norte niadtong Mayo 22.
