BUTUAN CITY – Gikumpirma ni Task Force Kapihan spokesperson Edelito Sangco nga duna sila’y gi-monitor nga laing grupo human nakitaang dunay mga kalihukan nga susama sa gihimo sa Socorro Bayanihan Services Iincorporated kon SBSI nga gikonsiderang kulto.
Gipanganlan kini ni Sangco og Maharlika Nation nga anaa ra usab sa lungsod sa Socorro, Surigao Del Norte.
Sigon ni Sangco, lakip sa gibuhat sa Maharlika Nation ang wala pagpabalik sa eskwela sa kabataan ug wala na pagpabalik sa trabaho sa mga trabahante.
Duna usab matud pa kini kaugalingong Tribal School ug kaugalingong Maharlika Nation Cemetery.
Duna usab silay kaugalingong panggobyerno diin dunay kaugalingong kwarta. Usa matud pa kini ka tribal nga nasakyan sa scam diin muabot sa usa ka libo ang miyembro.
Pasabot pa ni Sangco nga nabalita na kini niadtong 2019 human nga daghang mga tawo gikan sa lagyong dapit sama sa Zamboanga ug Cotabato ang miabot sa ilang lugar aron mu-apil sa Maharlika Nation.
Sa karun, duna nay lakang nga gihimo ang gobyerno aron masumpo ang maong grupo.
