BUTUAN CITY – Hingpit nang napakanaog sa ginsakpan sa 29th Infantry (Matatag) Battalion ug 30th Infantry (Fight ‘on) Battalion ang patay’ng lawas sa tulo ka mga rebeldeng New People’s Army kon NPA nga napatay sa engkwentro kagahapon sa Mt. Apo-Apo, Sitio Dugyaman, Brgy Anticala, ning siyudad sa Butuan.
Sa eksklusibong pakighinabi sa Bombo Radyo Butuan, gibutyag ni 1st Lt. Jade Bryce Buñe, ang Civil Military Operations kon CMO officer sa 29th Infantry Battalion, Philippine Army nga gilangkuban ang mga napatay sa engkwentro sa duha ka mga babaye ug usa ka lalaki nga gibana-banang nag-edad na og 35-anyos pataas.
Ila pang gi-verify ang impormasyon gikan sa mga kanhi ka-ubanan sa mga namatay nga apil niini ang magti-ayon nga taud-taud na usab nga naglihok sa kabukiran.
Sigon sa opisyal, nakig-alayon na sila sa mga opisyal sa Brgy. Anticala aron matabangan sila pag-ila sa mga niini sa ingon ma-uli na kini sa ilang tagsa-tagsa ka mga pamilya.
Ang pagpindot matud pa sa mga supporters sa walhong grupo nga gikapoy na sa ilang presensya maoy nahimong yawe nga natud-an ang ilang gikampuhan hinungdan sa gilusad gilayon nga combat operation.
Gitu-uhan usab sa opisyal nga ang ilang na-engkwentro susamang grupo ra usab nga ilang na-engkwentro ning mi-aging bulan sa may Brgy. Pianing area.
