BUTUAN CITY – Laing kalampusan ang natala sa hini-usang pwersa sa 29th Infantry (Matatag) Battalion ug 30th Infantry (Fight ‘on) Battalion human nila na-engkwentro ang Communist Terrorist Groups nga gilangkuban sa SYP21C, WGF21 ug Platoon Dao, Sub-Regional Sentro de Grabidad Westland nga parehong ubos sa kadumalahan sa Sub-Regional Committee Westland, Northeastern Mindanao Regional Committee kon NEMRC sa Mt. Apo-Apo, Sitio Dugyaman, Brgy Anticala, ning siyudad sa Butuan kagahapon.
Tungod sa report sa mga residente kalabot sa paglibot-suroy sa mga armadong grupo sa kabukiran sa maong baangay, nagpakatag gilayon si LtCol. Cresencio Gargar, Commanding Officer sa 29IB ug kasundaluhan isip tubag sa concern sa katawhan.
Na-engkwentro sa kasundaluhan ang gibana-banang 30 ka mga rebelde sa ila mismong hideout.
Mihangyo gilayon og Close Air Support ang tropa aron malikayan ang posibleng pagkakalas sa kinabuhi tungod sa gipangtanom nga anti-personnel mines (IEDs) sa mga kaaway.
Miresulta kini sa pagkamatay sa tulo ka mga rebeldeng padayon pang gi-ila ug pagkakumpiska sa 15 ka mga high powered firearms ingon man sa mga terrorist documents nga duna’y high intelligence value.
