BUTUAN CITY – Dungan sa gihimong job fair, gilusad usab ang ‘Kadiwa ng Pangulo Para sa mga Manggagawa’ kaganinang buntag dinhi sa Butuan City kondiin ka-abag sa Regional Office sa Department of Labor and Employment ang Department of Agriculture ug ang Department of Trade and Industry.
Dinhi gihatagan og higayon ang napulo ka mga Micro, Small and Medium Enterprises kon MSMEs nga makapaninda sa ilang mga produkto apil na ang Farmers Cooperatives and Associations ning rehiyon.
Apil sa gilinyahan sa mga tawo ang tag-25 pisos lang nga presyo sa kada-kilo sa bugas sa National Food Authority kon NFA ingon man ang gipang-display nga mga gulay, itlog, prutas, bugas, snacks, pasalubong ug mga non-food items.
Sa baligyang bugas, gilimitahan lang og tag-upat ka kilo ang mapalit sa matag-TUPAD Beneficiaries ug uban pang mga indibidwal.
Gipasigarbo sa mga farmers’ cooperative/association ang ilang mga produkto sa ubos nga presyo.
Sigon ni Department of Agriculture-Caraga Director Ricardo Oñate Jr. sa exclusive interview sa Bombo Radyo Butuan, all out ang ilang suporta sa mga kalihukan sa DOLE sa ingon niini nga kalihukan ilabina nga oportunidad kini sa mga mag-uuma ilabina sa mga agripreneurs aron mapakita ang ilang mga produkto.
