BUTUAN CITY – Gihikay na karon sa mga army paratroopers sa 3rd Special Forces “Arrowhead” Battalion, Special Forces Regiment Airborne ang mga papeles ug uban ang mga kinahanglanon alang sa pag-enrol sa usa ka lider sa rebeldeng New People’s Army kon NPA ngadto sa Enhance Comprehensive Local Integration Program kon ECLIP human ang iyang pagtahan.
Sa eksklusibong pakighinabi sa Bombo Radyo Butuan, gi-ila ni Lt. Juvenie Alpeche, sa 3rd Special Battalion, Philippine Army ang mitahan nga si Patrick Tejeros Wagdos kinsa naila usab sa alyas nga si Ka Tuloy, squad leader sa Sandatahang Yunit Pampropaganda-Interior, Sub-Regional Committee sa Southland sa North Eastern Mindanao Regional Committee kon NEMRC.
Sigon ni Lt. Alpeche, mitahan si Wagnos ngadto sa ilang batalyon sa may Purok 3, Brgy. St. Christine, Lianga, Surigao del Sur bitbit ang siyam ka mga high-powered firearms.
Napugos matud pa kini pagtahan human nahuna-hunaan nga gi-ilad lang sila sa maong kalihukan ingon man tungod sa pressure nga hatud sa nagpadayong focused military operations sa 3rd Special Forces Battalilon sa ilang lugar.
Anaa pa usab ang kamingaw na niya ngadto sa iyang pamilya ug ang ka-ibog human nasayran nga giplastar sa kagamhanan ang nanurender niyang mga kanhi ka-ubanan.
Nasayrang gibitbit ni Wagdos sa iyang pagsurender ang siyam ka mga AK47 rifles uban sa pito ka mga ammunition magazines.
