BUTUAN CITY – Misaka sa 8.1 porsiento ang inflation rate sa Caraga Region sa bulan sa Enero 2023.
Kini ang gitaho ni Rosalinda Apura, regional director sa Philippine Statistics Authority kon PSA-Caraga sa pakighinabi ning sibyahan.
Sigon ni Apura, ang nasangpit nga rata mas taas kung ikumpara niadtong Disyembre 2022 nga anaa lang sa 7.4 porsiento samtang halos doble usab ang pagtaas kung ikumpara niadtong Enero sa nakalabay nga tuig nga anaa lang sa 4.3 porsiento.
Dugang pa ni Apura, nahimong major contributor ug main source sa nasangpit nga inflation rate ang food and non-alcoholic beverages particular na ang mga gulay.
Samtang misegunda niini ang housing, water, electricity, gas ug ubang produktong petrolyo apan ang maong inflation rate, mas ubos gihapon kung ikumpara sa national level nga anaa sa 8.7 porsiento sa susamang buwan.
Pasabot pa sa opisyal, muabot sa 3,154 ka mga items kon gitawag nilang market basket ang ilang kanunay nga gi-monitor nga presyo kondiin pinakadaghan sa market basket ang Surigao Del Sur nga dunay 629 ka commodity samtang pinakagamay ang Dinagat Island nga duna lama’y 472.
Samtang sa inflation rate sa matag-probinsiya ning rehiyon, ang Agusan Del Sur anaa sa 8.8 porsiento, ang Surigao Del Norte dunay 8.3 porsiento, Surigao Del Sur nga dunay 8.3 porsiento, Dinagat Island ang dunay pinakataas nga mi-abot 10.3 porsiento samtang ang Agusan Del Norte duna lama’y 6.54 porsiento.
Gipasabot usab sa opisyal nga ang ilang buhatan igo lang magkuha og mga datus aron mahatag ngadto sa mga lokal nga kagamhanan ug ubang ahensiya sa gobyerno alang sa himoon unya nilang lakang og mga programa.
