BUTUAN CITY – Giparepaso na sa kadumalahan sa Philippine Army ang kakulangon matud pa sa recruitment ug training process sa ilang han-ay human ang duguong pagpamusil sa Camp Evangelista sa Cagayan de Oro City niadtong Sabado sa kaadlawon nga miresulta sa pagkamatay sa lima ka mga sundalo apil na ang suspek.
Nadala na sa ilang tagsa-tagsa ka probinya ang mga biktima nga sila Private Joseph Tamayo, Patrolman First Class Prince Kevin Balaba, Sgt. Rogelio Rojo, og Cpl. Bernardo Rodrigo samtang ang suspetsadong namusil naila usab nga si Private Johmar Villabito samtang laing sundalo pa ang nasamdan nga si Staff Sgt. Braulio Macalos Jr. nga karun anaa na sa luwas nga kahimtang ug padayon pang ngpa-alim sa ospital.
Nasayrang natulog matud pa ang mga biktima sulod sa ilang barracks sa Service Support Battalion (SSBN) unit dihang misulod si Private Johmar Villabito og gipamusil sila gamit ang M16 rifle.
Naka-responde usab sila Pvt. Mark Anthony Aguined ug PFC Joseph Estrada og napatay ang suspek.
Sa pakighinabi sa Bombo Radyo Philippines, gipadayag ni 4th Infantry Division Philippine Army Spokesperson Major Francisco Garello Jr. nga padayon pang gisuta ang motibo sa pagpamusil samtang gimugna na ang Board of Inquiry nga maoy motutuk sa imbestigasyon.
Samtang sigon ni Philippine Army spokesperson Xerxes Trinidad, muhimo og internal inquiry ang Board of Investigation aron matumbok ang motibo sa pagpamusil.
Gusto matud pa sa ilang kadumalahan nga palig-unon pa ang ilang recruitment process aron dili na ma-usab ang maong insidente kondiin apil sa ilang lantawon kung sa unsang paagi mipa-ilalom sa training ang mga recruits apil na ang medikal ug pisikal nga pagsusi.
Gipanganlan na sa otoridad ang mga namatay sa natigayong pagpamusil sulod mismo sa Support Service Battalion Headquarters sa 4th Infantry Division Philippine Army sa Camp Evangelista sa Barangay Patag sa Cagayan de Oro City sa nakalabay nga adlaw.
