BUTUAN CITY – Mi-abot na sa 22 ka mga tawo ang patay samtang dili mu-ubos sa 50 ang angol sa gitira nga Russian rocket sa usa ka istasyon sa tren sa Ukraine atol sa ilang paghandom sa ika-31 nga anibersaryo sa ilang Independence Day human nakalingikawas gikan sa kadumalahan sa Moscow.
Sa iyang video address ngadto sa United Nations Security Council, gibutyag ni Ukrainian President Volodymyr Zelensky nga mi-igo ang rocket sa gamay nga lungsod sa Chaplyne.
Gika-ingong lima sa mga biktima ang nasunog-patay apil na ang usa ka 11-anyos nga batang lalaki.
Wala pa magpagawas og pamahayag ang Russia kalabot niini kansa sukad sa sinugdanan, balik-balik na nga nanghimakak nga gipang-target nila ang mga civilian infrastructures.
Sigon ni Zelensky, iyang nasayran ang rocket strike sa Chaplyne, samtang nangandam siya sa iyang speech alang sa Security Council, dayong butyag nga ingon niini ang gi-andam sa Russia alang sa UN Security council meeting.
Sa pagkakaron, upat ka mga karwahe na sa tren ang nasunog ug gila-umang musaka pa ang ihap sa mga casualties.
Madumdumang niadtong Abril, mi-abot sa 50 ka mga tawo ang patay sa airstrike usab nga gihimo sa usa ka train station.
Kagahapon, gisa-ulog sa Ukraine ang ilang tinuig nga independence day ug daan nang gilbutyag ni Zelensky ning mi-aging mga adlaw nga posibleng duna’y dautang himuon ang Russia aron lang mabalda ang ilang kasa-ulugan.
