BUTUAN CITY – Duha ka mga rebeldeng New People’s Army kon NPA ang napatay sa tropa sa 36th Infantry “Valor” Battalion human na-engkwentro ang gibana-banang 10 ka mga rebelde sa bukirang bahin sa Brgy. Nurcia, lungsod sa Lanuza, Surigao del Sur kagahapon sa alas-tres sa hapon.
Kini human gisumbong sa mga residente sa Brgy. Nurcia ang planong pagpangilkil sa mga rebelde sa himuong campaign rallies sa mga pulitiko rason nga gisumbong nila ang ilang nahimutangan.
Dali gilayong naglusad og clearing operations ang kasundaluhan nga miresulta sa 10-minutos nga engkwentro nga miresulta sa kamatayon sa duha ka wala pa nailang mga rebelde ug pagkarekober sa tag-usa ka M16 armalilte rifle ug kalibre .45 nga pistola.
Nakig-alayon gilayon ang 36th IB sa kapulisan human gidala ang patay’ng lawas sa duha ngadto sa Madrid District Hospital alang sa proper verification ug disposisyon.
