BUTUAN CITY – Gikataho sa 402nd Brigade Philippine Army ang natigayong engkuwentro tali sa mga kasundaluhan sa 30th Infantry (Fight On) Battalion ug mga miyembro sa teroristang NPA sa bukirang parte sa Sitio Alimayo, Brgy Payapag, Bacuag, Surigao del Norte sa nakalabay nga adlaw.
Nahitabo ang engkuwentro human makadawat og taho ang 30IB gikan sa mga residente mahitungd sa presensiya sa mga armadong grupo sa teroristang NPA nga gitoohang miyembro sa hiniusang pwersa sa Guerilla Front 16, nga gipanguluhan ni Alberto Castañeda o mas naila isip alyas JD ug ang gidumala ni Roel T Neniel o mas naila isip alyas Jacob.
Dali kining gi-aksiyunan sa kasundaluhan og pasado alas 7:00 sa buntag samtang nagpatrolya ang mga tropa sa nasangpit nga lugar gipabuthan sila sa mga armadong grupo ug nahitabo ang engkuwentro nga milungtad og 15 minutos.
Gibana-banang anaa sa 10 ka armado ang naka-engkuwentro sa tropa nga gelayong nanibat og nabiyaan ang ilang mga kagamitan sama sa duha ka Improvised Explosive Devices kon IEDs o mga ilegal nga pangpabusikad, 5 ka magasin sa AK47 nga armas, 30 ka bala sa 7.62mm ug tulo ka kahon nga dunay sulod nga 90 ka bala, bandoler, ug uban pang personal nga gamit og subersibong dokumento.
Sumala ni Lt Col Ryan Charles G. Callanta, commanding officer sa 30IB, mapasalamaton kini sa katawhan sa ilang padayon nga paghatag og mga impormasyon mahitungod sa nahimutangan sa mga armadong grupo saNPA.
Sa natigayong engkuwentro, napug-ngan matud pa ang pagsabwag og kagubot sa mga teroristang NPA sa nasangpit nga lugar pinaagi sa pagpanghadlok ug pugsanong pag-demanda og suporta ug extortion sa mga sibilyan.
