BUTUAN CITY – Malampuson nga narekober sa tropa sa kagamhanan ang 22 ka mga tag-as nga kalibre sa armas sa New People’s Army kon NPA uban sa daghang mga magazines sa bisinidad sa Bagul River, Brgy Kasapa II, sakop sa lungsod sa La Paz, Agusan del Sur.
Gihimo kni niadtong lunes, Abril 11, 2022 pinaagi sa retrieval operation nga gilusad sa 60th Infantry “MEDIATOR” Battalion, 10th Infantry “AGILA” Division, Philippine Army. Pasado alas 5:30 sa hapon sa dihang hingpit nga nakuha ang mga armas human usab gisumbong sa kanhe rebelde nga nagsurender sa 60IB sa pagpanguna ni Lt. Col. Merrill C Sumalinog, Acting Commander.
Lakip sa nakuhang armas ang 10 ka AK 47 Rifles, 7 ka M16 Rifles, usa ka ULTIMAX LMG, usa ka M14 Rifle, usa ka M79 Grenade Launcher, usa ka Garand Rifle ug usa pa ka M16 Rifle nga dili kumpleto na ang parts.
Ang lokasyon sa mga armas gibulgar sa usa ka Alyas Bolo, kanhe miyembro sa nagkaluyang Guerilla Front 3 (WGF3), Sub-Regional Committee 4 (SRC 4), Southern Mindanao Regional Committee (SMRC) human usab nagsurender sa 60IB niadtong Abril 5.
Sumala ni Alyas Bolo atol sa inisyal nga custodial debriefing nga ang nasangpit nga mga high-powered firearms gipanag-iyahan sa iyang mga kaubanan nga misurender na usab sa balaod. Gamiton unta matud pa kini sa subling pagpakusog sa puwersa sa Guerilla Front 3.
Sigon ni Lt. Col. Sumalinog, usa kini ka dakong kadaugan dili lang sa 60IB kundili sa tibook nasud tungod kay nakaparalisa kini sa mga rebelding anaa pa sa kalihukan. Nagmarka kini sa hingpit nga pagkaguba sa Guerilla Front 3 og ang ilang kapabilidad nga subling mag-organisa.
Gipaneguro nalang sa opisyal nga masaligan ang kasundaluhan sa pagpadayon pagprotekta sa malinawong palibot sa Agusan del Sur, Davao del Norte ug Davao de Oro. Ang nasangpit nga mga armas gikustudiya sa 60IB og gitakdang e-turned over ngadto sa Philippine National Police alang sa tukmang disposasyon.
