BUTUAN CITY – Nagpadayon ang hot pursuit operation sa kasundalohan batuk sa mga rebeldeng New People’s Army kon NPA nga nag-road blocking sa may Sitio Lubcon, Brgy. Mabahin, Cortes, Surigao del Sur kagahapon sa buntag.
Sumala ni Pol. Lt. Jimel Aquisita sa eksklusibong pakighinabi sa Bombo Radyo Butuan, gibana-banang 80 hangtod sa 100 ka mga myembro sa NPA ang mibabag sa kadalanan nga milungtad og 30 minutos.
Nakuha nila ang uniporme sa usa ka retiradong myembro sa Philippine Army lakip na ang mga libro sa sundalo, mga combat shoes nga nagkantidad og P20,000 ingon man mga pagkaon human gisulod ang iyang tindahan ug panimalay.
Gidugang pa ni Pol. Lt. Aquisita, mikanaog ang mga rebelde sa lugar tungod kay nahutdan na og pagkaon.
Dihang nadawat ang taho, wala gilayon sila miresponde sa lugar aron paglikay sa posibleng duguong mahitabo nga madamay ang mga sibilyan.
Giklaro usab niining wala’y nahitabong engkwentro tali na sa NPA ug kasundalohan ug gibutyag nga ang grupo gihapon ang gitudlong suspek sa pagpatay sa anak sa datu sa nasangpit nga lugar.
