BUTUAN CITY – Gitaho na sa mga caretakers sa Sideways Travelers’ Lodge sa may Purok 3A-, Brgy. Holy Redeemer ning siyudad sa Butuan ngadto sa City Social Welfare and Development kon CSWD, ang bag-ong natawong bata nga gibilin lang sa iyang inahan human nag-check in kagahapon sa Room No. 15.
Sa eksklusibong pakighinabi sa Bombo Radyo Butuan, gipadayag sa caretaker nga si Lore John ‘LJ” Barnizo nga pasado na alas-otso kagabii nila nakit-an ang bata nga natabunan na sa habol human gibiyaan sa iyang inahan alas-tres pa lang sa hapon dihang nananghid nga mukaon lang apan wala na mibalik.
Oras na matud pa sa pag-check out sa babayeng nakita nilang mabdos dihang mi-check in nga duna pa’y dalang diaper rason nga ilang gituktok ang kwarto.
Gisulod gilayon nila kini dihang wala’y mitubag ug dako na lang ang ilang kakurat dihang nagkadugo na ang beddings ug ang foam sa kwarto hangtud nga nakita nila ang note nga gibutang lang sa unlan ug nagsulti nga gibilin niya ang iyang anak dungan sa panghinaut nga unta pangga-on kini tungod kay iya matud pa kining pinangga.
Milagom na matud pa tungod sa katugnaw sa kwarto, ang mga tiil sa bata kinsa gihangyo sa inahan nga panganlan og ‘Gabriel’.
Nakalatid usab sa note nga gibilin sa inahan nga gitu-uhang anaa pa sa 20-anyos kapin ang panu-igon nga taga-Langihan lang siya ug kinahanglan niyang ibilin ang iyang anak tungod kay palahubog ang iyang amahan gawas nga nagtungha pa siya sa kursong midwifery.
Una na nilang gitu-uhang duna na’y anak ang babaye nga posibleng gibilin lang sa iyang pares dihang migawas kagahapon sa alas-tres sa hapon aron mukaon, hangtud nga nasuta nilang didto ra kini gihimugso sulod sa kwartong gi-abangan.
Kagabii pa sila mitawag sa mga pulis apan wala matud pa’y mitubag sa ilang mga tawag hangtud nga ila na lang kining gipa-blotter kaganina.
Gitu-uhan ni Barnizo nga dugay nang plano sa inahan nga didto sa ilang lodging house kini manganak base na usab sa mga gisulat niini sa gibiling note.
Gihangyo matud pa nila ang taga-CSWD nga sila una ang mukustodiya sa bata samtang gihikay pa ang mga papeles alang sa bata hangtud nga duna na’y mu-claim nga ginikanan niini.
Ang iya matud pang amo ang misugyot nga sila una ang mukostudiya kang Baby Gabriel kung wala pa’y mu-claim niini ilabina nga tinu-uhanna sa mga Pinoy nga swerte ang dala niini ngadto sa nakakita sa bata ilabina nga didto kini gihimugso sa ilang lodging house.
Panapos pa ni Barnizo, tabangan nila og ampo ang inahan kinsa base sa iyang gibiling note, dili niya kayang buhion ang iyang anak tungod kay usa siya ka working student ug duna pa’y gihambing heart failure.
Andam matud pa silang atimanon ang bata ug andam usab higayong mu-abot na ang panahong gusto niining du-awon ang iyang anak, kung anaa pa kini sa ilang kostudiya.
