BUTUAN CITY – Alarming na kaayo ang kakulang karon sa medical oxygen supply sa tibook Caraga Region tungod sa pagtaas sa demand niini sa ubang hospital ning rehiyon.
Sa eksklusibong pakighinabi sa Bombo Radyo Butuan kang Krizzia May Liong, ang administrative assistant sa Pryce Gas Inc sa may Brgy Taguibo ning siyudad sa Butuan, gibutyag niini nga ang ilang area usa lamang ka planta sa LPG nga buot pasabot igo lamang sila mukuha og suplay sa ubang lugar.
Sumala pa niini, niadto pang tunga-tunga sa Agusto sila nakasinati og kakulang sa suplay sa medical oxygen ilabina nga mitaas usab ang demand niini sa Butuan Medical Center kansa mao ang ilang gina-suplayan kaniadto pa apan karun halos entiro ospital na sa rehiyon.
Gibutyag pa ni Liong nga kung kaniadto muabot lang sa 3,000 ka mga cylinders ang demand sa BMC apan karun halos mitriple na hinungdan nga kung duna man sila’y mahabiling suplay, gina-preserba na lang nila kini sa maong ospital.
Dugang pa niini nga misaka na usab ang mga walk-in orders karun sa ilang kompanya sukwahi kaniadto nga muabot laang sa 10 ka mga tawo apan sa karun kapin 50 na ka mga walk-in ang mo-request kanila og suplay.
Tungod niini, sa matag suplay sa medical oxygen nga muabot diha sa ilang kompanya, gina-bahin-bahin na lang nila kini ngadto sa mga nag-demand aron dili usab magmahay.
Padayon karun ang paningkamot sa kompanya nga mapadali ang pagkuha nila og mga suplay gikan sa Visayas human usab nakasinati og susamang problema ang ilang ginakuhaan kaniadto sa Cagayan de Oro City.
