BUTUAN CITY- Nasayran karun sa Cantilan Municipal Police Station sa Surigao del Sur nga mismong si Brgy Kap. Noel Azarcon alyas Tiger sa Brgy Tapi, sa nasangpit nga lungsod ang nanag-iya sa nakumpiskang illegal cut lumber didto sa Purok 2, Brgy Tapi, ning nakalabay nga adlaw.
Kini human nga dunay nadawat nga tawag ang personahe ni PMaj Ferdinand Tavares kauban ang Forester nga si Charles Sullano DMO III, CENRO Cantilan diin gilayong gi-adtuan sa mga niini aron ma-beripika ang nasangpit nga taho.
Tungod niini, nakita nga ang tinubdan sa pangwarta sa kapitan mao ang illegal logging nga gipaluyuhan matud pa sa dakong politiko sa lungsod sa Cantilan.
Sumala pa, dili na kini matawag nga ginagmay nga panginabuhi-an tungod sa kadaghan nga gipalusot nga mga kahoy ingun man sa kadako sa kantidad niini.
Nasayran nga nahimong bagsakan sa palusot nga illegal nga kahoy ang nasangpit nga barangay ug padayon pa kini sa ilang operasyon tungod sa proteksyon matud pa sa dakong politiko nga bisan ang CENRO Cantilan nahimong buta ug bungol sa illegal nga binuhatan.
Samtang,ang nasangpit nga mga illegal nga kahoy ibyahe matud pa pinaagi sa motorboat ug dalhon paingun sa layong dapit.
Gani ang mga nakumpiskang forest product gibana-banang muabot sa 17,000 board feet nga dunay market value nga 500,000 pesos.
Sa kasamtangan gi-turn over na sa kadumalahan sa DENR- CENRO Cantilan Surigao del Sur ang illegal nga pinutol nga mga kahoy.
