BUTUAN CITY – Miresulta sa kamatayon ug pagrekober sa mga high powered firearms sa New People’s Army (NPA) ang sunod-sunod nga engkwentro nga natigayon tali sa militar sa Buenavista, Agusan del Norte ning nakalabay nga adlaw.
Sa pakighinabi sa Bombo Radyo Butuan, gibutyag ni Lt. Col. Julius Cesar Paulo, Commanding Officer sa 23rd Infantry “Masigasig” Battalion Philippine Army, nga nakadawat sila og sumbong gikan sa mga residente sa Sitio San Vicente, Barangay Sangay, Buenavista, nga ang mga NPA naghimo og extortion activities sa lugar.
Sumala ni Lt.Col Paulo unang natigayon ang ekwentro niadtong Mayo 19 , alas-11 sa buntag diin dili mo-ubos sa 6 ka mga CNT members nga gituohang mga nabiling sakop sa nagkahuyang nga Guerrilla Front (GF) 4A nga gipanguluhan ni Jelan Pinakilid alias Baking ang naka-agbat sa tropa ug milungtad kini og lima ka minutos.
Nagtuo usab ang militar nga ubay-ubay ang grabehang samaran sa maong grupo human nakitang mga dugo sa encounter siete adiser nanibat sa nagkadaiyang direksyon samtang wala usay casualty sa panig sa gobyerno.
Dugang ni Lt.Col Paulo , human ang nasangpit nga engkwentro, gilayong naghimo og checkpoint operations ang tropa uban sa Agusan del Norte Police Provincial office (ADNPPO) sa Barangay Guinabsan, sakop sa na sangpit nga lungsod diin dinhi nasikop ang usa ka CNT member nga nailang si Mariel Catipan, 26 anyos, kinsa misulay pa og ikyas sa tropa.
Pag-abot usab sa kagabhion sa maong adlaw, usa ka minor de edad nga NPA nga sakop sa GF88, NCMRC ang mi-surrender sa tropa. Ang nasangpit nga personalidad atua usab matod pa sa engkwentro nga unang natigayon sa Sitio San Vicente, Barangay Sangay sa maong lungsod ug nabuwag sa grupo human nag-iyahay og panibat.
Ang maong engkwento miresulta usab sa pagkarekober sa usa ka Rusi motorcycle, helmet, civilian pack bag, USB connector, mga selpon, sim cards, ug klase-klase personal nga kagamitan.
Dugang sa opisyal nga kagahapong adlawa alas-6:30 sa buntag, naka-engkwentro usab sa militar ang dili mo-ubos sa 15 ka mga CNT members kinsa mga nabiling sakop sa GF4-A sa Sitio Balatakan, Barangay Guinabsan, sa susamang lungsod.
Dinhi na usab narekober ang usa ka patay’ng lawas sa NPA ingon man ang duha ka high powered firearms nga AK-47 rifles ug mga personal nga kabtangan human ang 15 ka minutos nga engkwentro.
Padayon pa usab nga gipakisayran ang identity sa napatay nga NPA.
