BUTUAN CITY –Activated na ang tanang Local Disaster Risk Reduction and Management Offices kon Local DRRMOs sa Surigao del Sur human gipa-ilalom na signal no 2 apil ang ubang lugar anaa ilalom sa signal no 1 tungod sa bagyong Crising.
Sa ekslusibong pakighinabi ning sibyahan kang Abel de Guzman, ang Chief sa Surigao del Sur Provincial DRRMO, gibutyag niini nga kagahapon pa lang sa buntag duna na’y gipagawas nga order si Governor Ayec Pementel ngadto sa tanang LGU’s nga kinahanglang mangandam alang sa gila-umang paghapak sa bagyo sa ilang lugar.
Lakip usab sa maong order, mao ang pag abiso sa tanang mga mananagat sa maong lugar nga dili na mulawig ilabina kung mukusog na ang balud sa kadagatan.
Hangtod sa pagkutlo niini nga balita, manageable pa ang sitwasyon sa probinsya sa Surigao del Sur taliwala nga on and off ang ilang nasinati-ang ulan.
Gidugang pa ni de Guzman nga padayon silang nagpahimangno sa tanang mga residente makig-kooperar sa ilang matag LGU aron sa ingon nga ma aksyunan gilayon ang bisan unsa mang panghitabo sa ilang areas.
