BUTUAN CITY – Suportado sa 4th Infantry Division, Philippine Army ang pagtudlo ni Pangulong Rodrigo Duterte kang Philippine Army chief Lt. Gen. Cirilito Sobejana isip ika-55 nga AFP chief of staff.
Sa pakighinabi sa Bombo Radyo Butuan, gipadayag ni Maj. Rodolfo Cordero Jr., tigpamaba sa 4th Infantry Division, wala na sila natingala nga si Lt. Gen. Sobejana ang gitudlo sa maong posisyon sanglit dili malimod nga usa kini kamaayong opisyal ug lider sa AFP, ilabina nga Medal of Valor awardee kini kansa mao ang pinakataas nga award sa militar ug nagpamatuod lang sa mga maayong nahimo niini, kontribusyon ug kaisog niini sa han-ay.
Mala-umon si Maj. Cordero nga mapaayo pa ug ipadayon ni Sobejana ang modernization sa kasundalahon ug mamintina o mapataas ang morale sa ilang han-ay. Gibutyag usab sa opisyal nga si Lt. Gen. Cirilito Sobejana, ang mahimo nilang bisita sa ilang anibersaryo karong Pebrero 1.
