BUTUAN CITY – Gikumpirma ni 1Lt Roel T. Maglalang, Civil Military Operation kon CMO Officer sa 23IB, Philippine Army nga niadtong Oktube 9, 2020 sa Agusan del Norte Provincial Hospital sa Butuan City nanganak na ang 18-anyos nga kanhe miyembro sa New People’s Army kon NPA nga na-rescue sa tropa sa kagamhanan.
Naila ang kanhe rebelde nga si Alyas Wena nga nagsilbing Squad Medic sa SYP SIKOP, Guerrilla Front-4A, North Central Mindanao Regional Committee (NCMRC) sa dul-an duha ka tuig. Gidani kini og gi-recruit sa kumunistang NPA sa edad nga 16-anyos.
Mahinumdumang si Alyas Wena kauban si Alyas Apay kansa mabdos usab, ang na-rescue sa tropa sa 23IB sa Barangay Guinabsan, Buenavista, Agusan del Norte niadtong Mayo 16, 2020.
Gipapuyo kini sulod sa Masigasig Happy Home og gi-asisteran og gi-monitor ilabina atol sa ilang prenatal, ultrasound, og uban pang gikinahanglang aktibidad aron maseguro nga luwas og himsog nga mahimugso ang bata.
Gipaneguro usab sa maong unit sa kasundaluhan nga madawat niini ang tabang og benepisyo nga gihanyag sa gobyerno ngadto sa mga kanhe rebelde.
Malipayon usab nga gi-welcome ni Lt. Col. Julius Cesar C Paulo, ang Acting Commander sa 23IB ang bag-ong nahimugso nga bata nga himsog bisan paman sa giatubang karun nga pandemya. Dugang pa sa opisyal nga si Alyas Wena ang usa sa mga survivors sa engkuwentro sa Sitio Likudon, Brgy Kamanikan, Gingoog City niadtong Mayo 10, 2020, diin 15 ka NPA combatants ang napatay diin lakip si Alyas Nady ang mabdos usab nga rebelde ang usa sa mga casualties.
Nanghinaot nalang ang 23rd IB commander nga ang kinabuhi ni Alyas Wena magsilbing inspirasyon sa mga NPA Amazona nga nagpabiling gihiktan sa sayop nga ideolohiya nga mobalik na sa sabakan sa balaod aron makauban ang ilang pamilya.
