BUTUAN CITY – Ipahigayon sa pinaka-unang higayon sa Lope Asis Gym, Bayugan City ang Entrance Examination sa Philippine Military Academy kon PMA sa Caraga Region.
Gitakda kining sugdan ugmang adlawa, Setyembre 23 ngadtu sa Setyembre 26. Muabot sa 556 ka aspirants ang naka-register alang sa maong eksaminasyon diin sa maong ihap 175 ang residente sa Butuan City. Pasabot pa ni Major Francisco Garello jr, Civil Military Operations kon CMO Officer sa 402nd Brigade Philippine Army, gibalhin ang testing center nga kanhe gihimo matag tuig ning siyudad sa Butuan tungod sa sitwasyun may kalabutan sa Covid-19.
Kinahanglan lang nga magsoot og facemask og face shield sa mga mo-eksam lakip na ang travel pass nga kuhaon sa barangay. Gihatagan na og schedules ang mo-eksam aron dili maghuot sa venue og makasunod sa health protocols nga social distancing.
Mahimong assembly area sa Butuan City ang Bancasi area sa headquarters sa 402nd Brigade aron didto na mosakay og dili na maproblema sa transportasyon lakip na sa ma-agian nga checkpoints. Dunay rental vans usab nga gihanyag ang Bayugan City og gihangyu usab ang Butuan City Government alang sa dugang transportasyon.
Sumala pa ni Garillo nga ang mga mo-take sa exam nga gikan sa mga lugar nga dunay taas nga risgo sa Covid-19, mopailalom kini sa rapid test nga libreng ipahigayon diha sa may Barangay Noli, sa kanhe headquarters sa 3rd Special Forces Battalion diin kung magnegatibo deretso na sa venue apan ang magpositibo, duna silay kaugalingong lawak diin sila mo-eksam.
Sugdan ang eksaminasyon sa alas 9:00 sa buntag ngadto sa alas 12:00 sa udtu sa unang usa ka gatus ka mga mokuha. Sumala pa sa opisyal nga dunay usa ka adlaw nga gigahin alang sa mga walk-in examinees.
Lakip sa gikinahanglan lang nga dalhon mao ang musunod: examination permits; medical certificate; health declaration form; PSA Birth certificate; 2 pieces 2×2 pictures; 2 ka lapis; og valid id.
Ang qualifications niini mao ang musunod: Natural born filipino, physically fit og dunay good moral character; single og wala nahimong inahan o amahan, highschool graduate og dunay general grades nga dili moubos sa 85 percent; 5 ft ang katas-on; walay crimanal cases; at least 17-anyos apan dili mas labaw sa 22-anyos sa Abril 1, 2021; og dapat mopasar sa eksaminasyon.
