BUTUAN CITY – Nagpaabot og dakong pagpasalamat sa Bombo Radyo Butuan ang usa ka senior citizen nga Butuanon human hingpit na kining na-operahan og nakuha ang tumor sa iyang lawas.
Sumala pa ni Bernabe Moreno, karung adlawa sa dihang nakagawas na siya sa ospital sa may Agusan Del Norte Provincial Hospital og wala nay gibating sakit human nakuha ang tumor nga halos usa ka kilo ang kabug-aton.
Tungod niini, gikonsidera ni Moreno nga dakong kabahinan sa iyang natagamtam nga kaayuhan ang Bombo Radyo Butuan nga maoy nag-facilitate aron siya hingpit nga ma-operahan og makuha ang tumor.
Saysay pa ni Moreno, makonsidera niyang 50-50 na ang iyang kinabuhi niadtong higayon nga kinahanglan nang ma-operahan siya apan wala kini nahitabo tungod kay wala siya isyuhe og certificate sa Department of Health bisan og natapos na niya ang 14 ka adlaw nga quarantine period human usab nagpositibo sa rapid test.
Daghan na matud pa siyang gidool aron siya matabangan apan wala kini aksiyun. Maayu na lang matud pa kay nakahuna-huna siya sa Bombo Radyo nga maoy iyang katapusang paglaum.
Hinoon wala siya napakyas tungod kay gitabangan siya sa Bombo Radyo diin gelayon siyang gi-refer sa ospital og nahatagan sa schedule sa hinanaling operasyon.
Nanawagan nalang si Moreno sa katawhan nga dunay problema nga dili magpanuko sa pagdool sa Bombo Radyo Butuan.
