BUTUAN CITY – Gideklarang “persona non-grata” sa Barangay Kasapa 1, sa lungsod sa Loreto, Agusan del Sur ang Communist Party of the Philippines-New People’s Army-National Democratic Front kon CPP-NPA-NDF ug ang ilang mga legal fronts nga nagtimaan sa pagtapos na sa ilang pagsuporta sa komunistang kalihukan.
Gawas sa pag-wara-wara sa placards nga nakatatak ang mga terorismong binuhatan sa NPA, mihimo usab sila og kanta samtang nagtapok atubangan sa mga provincial government officials nga gipangunahan nila Gov. Santi Cane, Jr. ug Vice Gov. Sammy Turtor.
Anaa usab sa maong kalihukan sila Loreto Mayor Lorife Magadan, Vice-Mayor Doy Plaza kauban ang ilang mga konsehal ingon man sila 10th ID commander Maj. Gen. Reuben Basiao, 101st IB commander Col. Luis Rex Brigante ug 60th IB commander LtCol. Ronaldo Sarmiento apil si PNP PD – PCol Ringo Zarzoso.
Ubay-ubay usab sa mga kanhi NPA leaders usab ang maisugong nagpagawas sa ilang sentimento base sa ilang personal nga kasinatian atol sa ilang aktibong kinabuhi sulod teroristang grupo.
