BUTUAN CITY – Mi-abot sa katibuk-ang 21 ka mga kanhi rebelding New People’s Army kon NPA ang nakadawat og financial assistance gikan sa Enhance Comprehensive Local Integration Program kon E-CLIP sa gobyerno.
Ang paghatag sa tabang-pinansiyal gihimo dinhi sa Butuan City nga gipangunahan nila Agusan del Norte Governor Dale Corvera, Agusan del Norte 2nd district representative Ma Angelica Amante-Matba, kauban sila Regional Director Lilibeth Famacion sa Department of Interior and Local Government kon DILG-13, 402nd Brigade Commander Brig. Gen. Maurito Licudine, 29th Infantry Battalion Commander Lt. Col. Isagani Criste ug 23rd Infantry Battalion Commander Lt. Col. Julius Cesar Paulo.
Sa 21 ka mga kanhe rebelde, 15 ang misurender sa tropa sa 23rd IB, nga kadaghanan mga kanhe miyembro sa Guerrilla Front Committee 4A sa North Central Mindanao Regional Committee sa NPA, upat sa 29th Infantry Battalion, og duha sa Police Regional Office kon PRO-Caraga.
Kinatibuk-ang 12 ka armas ang gitahan sa mga kanhe rebelde ngadto sa gobyerno atol sa maong kalihukan diin 7 ang gikan sa misurender sa 23rd IB samtang 5 ang gikan sa 29th IB. Lakip sa gitahan nga armas ang duha ka .45 caliber pistols, duha ka M16 rifles og tulo ka carbine rifles samtang ang gitahan sa 29th IB mao ang usa ka M14 rifle, usa ka .38 caliber pistol, usa ka AK-47 rifle, usa ka carbine rifle, ug usa ka shotgun.
Ang kada-usa kanila nakadawat og 86-mil pesos isip immediate livelihood ug re-integration assistance gawas pa sa hygiene kits gikan sa Department of Health-13.
Lakip sa nakadawat sa E-CLIP assistance si Alias “Karla” kinsa nagpadayag og pasalamat sa gobyerno tungod sa suporta nga nadawat sa ilang pag-sugod sa bag-ong kinabuhi.
Si Alias Karla gi-recruit sa edad nga 14-anyos human nailad dihang gisaaran nga tabangang makahuman pag-eskwela ug boluntaryong mitahan niadtong Marso 27, 2019 kang Congresswoman Amante-Matba nga kaniadto governor pa sa Agusan del Norte.
Nagsugod kini sa bag-ong kinabuhi sulod sa 23rd IB headquarters diin niya nahimamat ang iyang hinigugma nga miyembro sa CAFGU Active Auxiliary (CAA), og nagpakasal sulod sa kampo niadtong Disyembre 18, 2019.
Sa pakighinabi ning sibyahan kang Lt. Col. Julius Cesar Paulo, commanding Officer sa 23Rd IB, gipadayag niini ang iyang kalipay nga nagtan-aw sa mga kanhe rebelde nga midawat sa benepisyong gikan sa gobyerno nga magamit sa ilang pagbag-o sa kinabuhi.
Gipanawagan na lamang niini ang mga aktibong miyembro pa sa NPA nga dili na maglangay sa pagbalik sa sabakan sa balaod samtang duna pa’y tsansang ilang pahimuslan.
