BUTUAN CITY – Nabati sa Covid-19 survivor sa rehiyon sa Caraga ang diskriminasyon.
Sa eksklusibong pakighinabi sa Bombo Radyo, gipahayag sa survivor nga sukad siya maka-abot sa balay human makarekober, dunay mga silingan nga ginalikayan na siya.
Apan ang nakapasakit pag-ayo kaniya, kay pati ang iyang mga miyembro sa pamilya, daw gipakitaan og taras nga dunay virus usab.
Giklaro sa survivor nga dili niya tinuyo ang mataptan sa virus diin biktima lang siya sa virus.
Tungod niini, nailhan matud pa sa survivor ang tinood niya nga mga higala. Sumala pa niini nga dunay mga higala usab siyang miadtu gyud sa balay aron mangumusta kaniya.
Una nang gisaysay sa survivor ang iyang kasinatian adiser nakarekober sa maong sakit. Sumala pa niini nga nakasinati siya og acute pneumonia diin naglisud na siya sa pag-ginhawa rasong gidala sa Caraga Regional Hospital.
Daw nahugno usab kini sa dihang gipahibalo sa doctor nga positibo siya sa Covid-19. Bisan paman niini, mas gipahugtan niya ang iyang pag-ampo sa Ginoo.
Naningkamot ang survivor nga dili mapildi sa virus pinaagi sa pag-take ug mga vitamins, paglakaw-lakaw sa buntag diha sa iyang isolation room ug pagpapalit sa iyang asawa og pagkaon gikan sa gawas sa hospital.
Tungod niini, mapasalamaton siya sa Kahitas-an og sa mga nag-atiman kaniya sa ospital.
