BUTUAN CITY – Nakasinati og discomfort ang mga Butuanons kagahapon human natala ang pinaka-init nga temperatura nga maoy pinaka-una dinhi sa Butuan.
Sa interview sa Bombo Radyo Butuan, gibutyag ni Lance Veranda sa PAGASA-Bancasi nga pasado alas 2:00 sa hapon dihang mi-abot sa 53-degrees Celcius ang heat index ning siyudad.
Kini tungod matud pa sa easterlies kon init nga hanging gikan sa sidlakang bahin sa Dagat Pasipiko kansa mamahimong maghatud og heat stroke.
Tungod niini, gipahinumduman sa opisyal ang mga Butuanons nga bisan og anaa sa general community quarantine kon GCQ ang kadaghanang mga barangay ning siyudad, mas maayong likayan gyod ang paggawas sa balay ug batasanon ang pag-inom og daghang tubig aron malikayan ang dehydration.
Nasayrang natala usab kagahapon ang heat index nga 51-degrees Celcius sa Ambulong sa Tanauan City ingon man sa Sangley Point sa Cavite City samtang 46-degrees Celcius usab an sa Clark, Pampanga; Maasin City; Science City of Muñoz; ug NAIA sa Pasay City.
