BUTUAN CITY – Giklaro sa Department of Health-Center for Health and Development kon DOH-CHD-Caraga nga duna lama’y usa ka kumpirmadong COVID-19 positive case ang rehiyon kinsa gikan ning siyudad sa Butuan ug kini nakalatid sa ilang COVID-19 situational report No. 61.
Sa eksklusibong pakighinabi ning sibyahan, gibutyag ni DOH-CHD Caraga regional director Jose Llacuna Jr. nga as per protocol, ang pasyente nagkinahanglan og duha ka mga follow up testing aron masusi kung ang COVID-19 virus anaa pa ba sa iyang lawas o wala na.
Ang resulta sa iyang unang follow-up test nga gipagawas niadtong Abril 12 nag-negative ug gihulatan pa nila ang resulta sa ikaduha niining follow-up test.
Giklaro usab sa opisyal nga ang maong unang kumpirmadong kaso makita gihapon sa ilang mapa tungod kay ila pa mang gihulatan ang resulta niini sa ikaduhang follow-up test.
Na-admit gihapon kini karon ug i-discharge lang depende sa assessment sa iyang attending physician ingon man sa iyang ikaduhang laboratory test result.
