BUTUAN CITY – Gi-relieve na ang training manager sa Regional Training Center kon RTC – Caraga sa may Camp George Barbers, sa Surigao City samtang padayon ang administratibong imbestigasyon sa namatay nga police trainee nga si James Polistico kinsa namatay atol sa subsob nga training.
Sa eksklusibong pakighinabi sa Bombo Radyo Butuan, gipadayag ni Police Regional Office-13 director PBGeneral Joselito Esquivel Jr., nga gituyo ang pag-relieve kang PLCol. Edcel Canals aron dili mamantsahan og pagduda ang ilang imbestigasyon.
Ila usab nga tan-awon kung rated ba ang referee nga ilang gigamit, kung naay suot nga protective head gear ang mi-away, ug kung gi-unsa pag-approve kung apil kini sa training.
Gidugang sa heneral nga lakip sa ilang tan-awon ang procedure sa boxing ilabina nga wala kini naka-abot sa ilang kasayuran tungod kay separate unit man ang maong training center sa PRO-13.
Aminado ang heneral nga isip boksidor, sayod siyang delikado ang boksing ilabina ang headshot rason nga dapat duna’y naka-standby nga medical team o kaha doctor ingon man ambulansya aron daling madala sa ospital higayong duna’y dautang mahitabo sa trainee.
