BUTUAN CITY – Sa ikaduhang higayon, subling gikansela sa rebeldeng grupong Communist Party of the Philippines kon CPP ang pagsa-ulog unta nila karong adlawa sa ilang ika-51 nga founding anniversary nga una nang gisibog gikan sa orihinal nga eskedyol niini niadtong Disyembre 26.
Sa eksklusibong pakighinabi sa Bombo Radyo Butuan, gipadayag ni Ka Oto – tigpamaba sa Guerilla Front- 15 sa Northeastern Mindanao Regional Committee sa New People’s Army kon NPA, pasado alas-sais na kagabii sila nagdesisyong kanselahon ang maong kalihukan nga gibansagan nilang ‘Peace Forum’.
Kini human nga ubay-ubay sa gipalit matud pa nilang mga pagkaon ug imnunon ang nababagan sa checkpoint sa hini-usang pwersa sa kapulisan ug kasundaluhang sakop sa 30th Infantry Battalion, Philippine Army sa may Sitio Banbanon, Brgy. Lahi, lungsod sa Guigaquit, Surigao del Norte.
Kini gawas pa sa pagkwestyon usab sa mga otoridad sa gi-imbitar nilang 20 ka mga bisitang mediamen gikan sa nagkada-iyang bahin sa Mindanao ug sa mga ginikanan sa ilang ka-ubanang kaslon unta ning adlawa.
Disyamado sila tungod kay nahitabo matud pa kini samtang nagtunhay ang ceasefire tali sa ilang han-ay ug sa tropa sa kagamhanan. Ang labaw nilang gikadismaya kay gawas sa checkpoint, duna pa’y naka-istamb ay nga duha ka 6×6 truck isip ugmentation force nga daw andam matud pa sa giyera.
