BUTUAN CITY – Duha ka mga hideouts kon tagu-anan sa mga rebeldeng New People’s Army kon NPA ang na-ilog sa mga sakop sa 402nd ‘Stingers’ Brigade. Philippine Army human ang sunod-sunod nga pursuit operations nga ilang gilusad sa two-third sa Caraga Region diin nag-operate ang mga rebelde.
Sa eksklusibong pakighinabi sa Bombo Radyo Butuan, gipadayag ni Major Francisco Garello – Civil Military Operations kon CMO officer sa maong brigada, ang unang hideout nga nadiskubrehan didto sa Brgy. Bangunay, Jabonga, Agusan del Norte kayang maka-akomodar og 60 ka mga tawo.
Samtang ang ikaduhang hideout nga nadiskubre sa Sitio Inadan, Brgy. Magroyong, San Miguel, Surigao del Sur, kayang maka-akomodar og 20 ka mga tawo.
Natud-an matud pa sa ilang ground troops ang maong mga tagu-anan base na usab sa tips sa mga tawong naka-ila kanila apan maglagot sa ilang presensya.
Dako ang pagpasalamat ni Major Garello tungod kay dili kini mahitabo kung wala ang kooperasyon sa katawhan kinsa kaniadto nagprotekta pa sa mga rebelde apan karon mibali na sa paghatag sa ilang simpatiya human nakita ang paningkamot sa kagamhanan alang sa ilang kaayuhan
