BUTUAN CITY – Padayon karung giila ang patay’ng lawas sa usa ka rebelding New People’s Army kon NPA human napatay sa engkuwentro nga natigayon sa utlanang bukid sa Barangay Manila De Bugabos, Butuan City og Barangay Simbalan nga sakop sa lungsod sa Buenavista, Agusan Del Norte.
Sigon ni Brigadier General Maurito Licudine, commander sa 402nd Brigade, Philippine Army, miulbo ang engkuwentro alas 6:50 sa buntag kagahapon tali na sa tropa sa 23rd Infantry Battalion og NPA diin milungtad sa hangtud sa udtu ang pagbinayloay og bala.
Sumala pa sa opisyal, nagpadala na og air support ang kasundaluhan tungod sa dakong puwersa nga naka-agbat niini. Human sa engkuwentro, narekober ang patay’ng lawas sa usa ka rebelde nga gitoohang minor-de-edad lakip na ang 4 ka mga tag-as nga kalibre sa armas.
Giturn-over na ngadto sa Barangay Kapitan sa Barangay Simbalan ang maong patay’ng lawas alang na usab sa pag-ila niini og pag-claim sa pamilya.
Sa inisyal nga impormasyon nga nadawat ni Brigadier General Maurito Licudine ang napatay nga rebelde igsoon sa kumander sa NPA.
PHOTO COURTESY OF JP PADERO
