BUTUAN CITY – Nagka-agbat ang Tropa sa 26th Infantry “Ever Onward” Battalion, Philippine Army ug rebelding New People’s Army sa bukirang parte sa So. Kapagangan, Brgy Weguam, Esperanza, Agusan del Sur, sa nakalabay nga mga adlaw.
Sigon ni Lieutenant Colonel Romeo C. Jimenea, Commanding Officer sa 26IB, ubay-ubay nga mga gitoohang NPA ang nakit-an sa maong lugar nga gitaho sa nagpakabanang lumolupyo rasong gilusad ang strike operation nga miresulta sa engkuwentro.
Ang nasangpit nga panagsangka milungtad sa 5 ka minutos nga miresulta sa pagkakumpiska sa usa ka AR18 assault rifle nga dunay magazine og 14 ka mga buhing bala, usa usab ka KG9 pistol uban sa magazine og 5 ka bala, usa ka hand grenade ug usa ka back pack nga dunay personal nga mga gamit ug subersibong dokumento.
Gidugang usab sa opisyal nga walay casualties sa panig sa gobyerno samtang dili pa madetermina ang ihap sa kalaban human nakita ang mga lama sa dugo sa dapit nga nahitaboan.
Sumala sa intelligence report, ang na-engkuwentro nga Communist Terrorists mga miyembro sa Sub Regional Committee Southland sa North Eastern Mindanao Regional Committee sa Communist Party of the Philippines’ (CPP) New People’s Army (NPA) nga nagpahigayon og recruitment ug kapintas sa lugar.
