Dako ang pasalamat sa grade 8 student sa Lianga National High School sa Lianga, Surigao del Sur ngadto sa mga nipaabot kaniya ug mga school supplies ug sa iyang maistra nga si Arcilyn Balbin Azarcon nga maoy nag-post sa iyang viral photos.
Sa eksklusibong pakighinabi sa Bombo Radyo Butuan, gibutyag sa 16-anyos nga si Erlande “Loloy” Monter, residente sa Brgy. San Pedro, lungsod sa Lianga, nga tinuod nga wala siya’y masulatan niadtong tungura human gi-drawing drawingan sa iyang manghud ang iyang mga notebook rason nga nagkuha nalang siya ug dahon sa saging aron maoy sulatan ug ipa-check kang Ms. Azarcon.
Pagbutyag ni Loloy walay trabaho ang inahan samtang DPWH maintenance worker usab ang iyang amahan. Emotional nga nagpasalamat si Loloy sa iyang miastra diin tungod sa viral photos daghan ang nagpaabot kaniya ug tabang. Gidugang sa magtuon nga determinado siyang matapos sa pagtuon aron makab-ot ang iyang pangandoy sa mahimong sundalo.
Una ng gibutyag sa maistrang si Arcilyn Balbin Azarcon nga lisud ang dalan ug distansya ang pinuy-anan sa iyang magtutuon. Duna usab matod pay higayon nga absent kini nga posibleng tungod sa kawala’y masakyan padulong sa eskwelahan. Gawas sa kakulang ug gamit ug kalisud sa kahimtang nakita niya ang determinasyon sa iyang estudyante nga makatapos sa pagtuon.
