BUTUAN CITY – Mi-apela og suporta ang Butuanon dance group nga Filimeter Crew human sila mi-qualify sa kompetisyun nga ipahigayon sa United Kingdom sunod tuig.
Sa pakighinabi sa Bombo Radyo Butuan, gibutyag sa lider sa maong grupo nga si Jobert Te Rentor, 22-anyos, nga dako kaayo sila og kinahanglanon aron makasalmot sa UDO World Championship sa United Kingdom karung Agosto 20 ngadto sa 23 sunod tuig.
Saysay pa ni Rentor, daghang miyembro ang ilang grupo apan tungod sa kakulang sa kwarta, 5 lang silang naka-adtu sa kauluhang Manila diin girepresenta ang Butuan og tibuok Pilipinas sa gipahigayong UDO Asia Pacific International Dance Championship 2019.
Ilang naka-atbang ang mga maayong dancers usab sa laing mga nasud sama sa Japan, China, United Arab Emirates, Russia, India, Malaysia, Thailand, Singapore ug Vietnam.
Sa maong kompetisyun mitapos sila sa ikatulong puwetso bitbit ang 5 ka mga bronze medals plus trophy ug ni-qualify pa sa World Dance Championship sa UK.
Sumala pa ni Rentor, desidido siyang dalhon ang iyang grupo sa United Kingdom rasong nanawagan kini og tabang.
Una nang gisaysay ni Rentor nga daghang mga dance competition na ang ilang na-apilan dinhe lang sa rehiyon sa Caraga diin sila midaog sa tanan nilang mga gisalmotan.
Kini ang rason nga misalmot sila sa mga dagkong kompetisyun hangtud na sa gawas sa nasud.
Ang pangalang Filimeter crew nagsimbolo sa pagka-Filipino og sa kataas sa ilang pangandoy diin ang mga miyembro gilangkuban sa managhigala.
