BUTUAN CITY – Nagpaabot ug kinasing-kasing nga pasalamat ang probinsiyal nga kagamhanan sa Cotabato sa tanang nadawat nilang tabang human gitay-og sa kusog nga linog sa nakalabay’ng mga semana.
Sa eksklusibong pakighinabi sa Bombo Radyo Butuan, gipadayag ni Mercy Foronda , Provincial Disaster Risk Reduction and Management Office kon PDRRMO-Officer sa Cotabato, nga nabati gayud nila nga usa ka pamilya lang ang mga Filipino human nadawat ang mga hinabang.
Nakita nila ang espiritu sa pagtinabangay ilabina ngadto sa mga nagkinahanglang katawhan human nangabot kagahapong adlawa nga tibook PDRRMC-Agusan Del Sur team bitbit ang ilang mga hinabang.
Nakapatandog pa niini ang ilang gisoot nga T-Shirt diin nakalatid ang ilang dakong pagpakabnana sa Cotabato.
Sumala pa ni Foronda nga dakong impact ngadto kanilang mga biktima sa linog ang nag-abot-abot nga tabang diin naminusan ang ilang gibati nga kagool og kabalaka.
Nagpasalamat na usab ang opisyal sa muabot pa nga tabang gikan sa rehiyon sa Caraga diin karung adlawa lauman ang pag-abot sa team sa PDRRMC sa Agusan Del Norte, ugmang adlaw usab ang LGU-Butuan nga sundan usa sa Surigao Del Sur, Surigao Del Norte ug Dinagat island.
