BUTUAN CITY – Padayon pang gi-ila sa 29th Infantry Battalion, Philippine Army nga usa ka batan-ong rebeldeng New People’s Army kon NPA nga napatay sa engkwentro ning mi-aging alas-dies sa buntag sa kabukirang bahin sa Kamingawan, Bgy San Isidro, Santiago, Agusan del Norte kansa mi-angol usab sa laing usa.
Sigon ni 1Lt Nonette Banggad, Civil Military Operations kon CMO officer sa 29th Infantry Battalion, Philippine Army, nagpatrolya ang mga sundalo sa lasang nga bahin kondiin gibana-banang 20 ka mga armadong rebelde ang ilang nakita nga duna’y bitbit nga mga armas kinsa ila pang gipanawagan nga musurender apan gipa-ulanan sila og mga bala hinungdan sa 15-minutos nga binakbakay.
Naila ang angol nga batan-ong miembro sa New People Army kon NPA nga si Kent Antonio, 19-anyos nga taga-Negros Occidental kinsa duha na ka tuig nang miembro sa SYP-16 A ubos sa lider nga si Ka Dom nga naglihok sa lungsod sa Santiago.
Aminado matud pa ang angol nga rebeldeng naglisod na sila sa kabukiran ilabina sa ilang pagkaon tungod kay wala na’y salig kanila ang katawhan kinsa manumbong ra usab sa kasundaluhan higayong makakita sa ilang presensya.
Narekober sa encounter site ang duha ka M4 rifles ug uban pang war materials.
