BUTUAN CITY – Nakuha sa mga elemento sa 36th Infantry Battalion, Philippine Army ang usa ka kampo sa Communist Party of the Philippines-New People’s Army kon CPP-NPA sa Sitio Suba, Brgy Mabuhay, Tandag City, Surigao del Sur.
Ang nasangpit nga kampo gibana-banang duna’y gilapdong 50×100 square meters ug kayang mu-akomodar og dili mu-ubos 50 ka mga tawo ug gitu-uhang pila ka adlaw nang gi-abandona.
Human sa ma-ampingon nga pagsuhid sa lugar, narekober sa tropa sa kagamhanan ang duha ka anti-personnel mines nga dunay 50-metros nga wire, tunga sa sakong bugas ug mga personal nga gamit.
Mas gipahugtan pa sa 402nd Brigade ang kampanya kontra CPP-NPA ilabina sa mga hilit nga barangay tungod sa apela sa katawhan nga segurohon ang kalinaw aron magpadayon ang gipaningkamutang kalinaw ug kalambuan sa ilang kumunidad.
Sukad niadtong Enero 2019, ang Stingers Brigade nakarekober og 57 ka mga kampo atol sa engkuwentro ug gilusad nilang security patrols diin halos tanan niini gitug-an sa mga sibilyang residente.
