BUTUAN CITY – Pormal nang gilusad ngadto sa publiko sa municipalidad sa San Luis, Agusan Del Sur ang gimugna nga Task Force to End Local Communist Armed Conflict kon ELCAC dungan sa unang 100 ka adlaw nga pagserbisyu sa bag-ong Mayor kagahapon sa buntag sa Barangay San Pedro sa maong lungsod.
Ang nasangpit nga aktibidad nabahin sa duha ka hugna; una ang “First 100 Days of Governance Report” sa mayor nga si Hon. Phoebe L. Corvera ug ikaduha ang gilusad nga Municipal Task Force- ELCAC”.
Gipangunahan mismo ni Mayor Corvera ang paglusad niini og gisaksihan sa mga nagkadaiyang nangulo sa cluster og nalambigit nga ahensiya lakip na ang AFP ug PNP, miyembro sa sangguniang bayan sa panguna sa vice mayor ug representate gikan sa provincial planning and development office.
Dunay tulo ka gimugnang clustered task forces nga gilangkuban sa Basic Services Delivery Team, Citizenship and Community Participation Team ug, Peace, Law Enforcement and Development Support Team.
Lakip usab sa namugna ang Retooled Community Support Program Core Team..
Ang MTF-ELCAC gibase sa National Task Force to End Local Communist Armed Conflict (NTF-ELCAC) alayon na sa Executive Order No. 70 nga nagtumong sa “Whole of the Nation” approach aron tuldukan ang insurhensiya sa nasud.
