BUTUAN CITY – Iberipika pa sa National Bureau of Investigation kon NBI-Caraga ngadto sa Securities and Exchange Commission kon SEC ang modus sa ‘Jenotech’, ang gika-ingong bag-ong pangalan karon sa Kabus Padatoon kon KAPA Community Ministery International Incorporated dinhi sa dakbayan sa Butuan.
Kini human gipa-abot sa ilang buhatan ang kada-adlaw na matud pa karong operasyon sa gidudahang lahi na usab nga klase sa investment scam nga nagpahigayon og re-entry ug revalidation sa ilang mga miyemro ilabina kadtong mga naka-pay in na apan wala’y nadawat nga return of investment.
Sigon ni NBI-Caraga regional director Mario Minor, base sa inisyal nga impormasyong ilang nakuha, religious activity pa lang matud pa ang gihimo sa maong grupo ug hangtud karon, wala pa sila’y nadawat nga reklamong gi-ilad sa maong grupo.
Dugang pa sa opisyal, ilang sayron sa SEC kung duna’y permit to operate ba ang maong grupo ug kung duna kini’y secondary permit nga maoy magpamatuod nga legal ang ilang patago nga gihimong lain na usab nga gitu-uhang investment scheme.
