BUTUAN CITY – Gikostudiya na sa kapulisan sa Buenavista, Agusan del Norte ang driver sa backhoe sa usaa ka construction firm nga nakaligis-patay og usa ka laborer didto sa Brgy. Alubihid, sakop sa maong lungsod.
Gi-ila ni Police Corporal Franco Baribar sa Buenavista Municipal Police Station, ang biktimang si Wilson Tecson Nova, 58 anyos, minyo ug residente sa Brgy. Anakan, Gingoog City, lalawigan sa Misamis Oriental.
Sumala sa opisyal, pasado alas-9:30 kagahapon sa buntag dihang niresponde ang ilang operatiba sa insidente diin ilang na-abtan ang nagbuy-od nang biktima.
Base sa ilang imbestigasyon, gimaneho pa-atras sa driver nga si Maiko Perez Javier 29 anyos, duna’y live in partner og residente sa Brgy. Odiong, Esperanza, Agusan del Sur, sa backhoe.
Wala matod pa nakamatikod sa maong sakyanan ang biktima ug mga kaubanan niini samtang kamulo og trabaho rason nga na-intimano kini pagkaligis nga nisangpot pa sa pagkabuak sa ulo ug pagsidlit sa utok.
Gipasakaan na og kaso ang suspek pinaagi sa inquest proceedings.
