BUTUAN CITY – Pabiling gipatuman sa Philippine Coast Guard kon PCG-Surigao del Norte ang temporary preventive suspension sa biyahe sa mga gagmay’ng sakyanang pandagat sa Surigao del Norte aron dili ma-usab ang nahitabo sa Guimaras-Iloilo Strait.
Sa eksklusibong pakighinabi sa Bombo Radyo kang PCG-Surigao del Norte station commander Commodore Lawrence Roque, gipasabot niini nga sa pagkakaron, gipatuman na kini ngadto sa mga nagtimbang ug 17-gross tonnage kon 17-tonelada paubos, base na usab sa gale warning nga gipakanaog sa Pagasa.
Samtang padayon usab ang biyahe sa ubang mga dagkong bangka nga lapas sa 17 tonelada ang gibug-aton, sama sa mga bangkang biyahe padulong sa Dinagat Island, Socorro ug Siargao Island, apan hugot nga gidili ang mga island hopping activities sa maong lalawigan.
Hugot usab ang mga gipahigayong pre-departure inspection sa PCG sa mga sakyanang mulayag aron pagseguro nga mabutang ang tanang mga pangalan sa pasahero sa manifesto sa vessel sa ingon malikayan ang overloading.
