BUTUAN CITY – Pormal nang na-turn over sa Bombo Radyo Butuan ngadto sa duha ka mga simbahan ning siyudad ang ubay-ubay nga mga medisina nga wala mahurot pagpang-apod apod atol sa gipahigayong Bombo Medico 2019 niadtong Hulyo 14 ning tuiga.
Unang nang natunol ning sibyahan ang nagkada-iyang tambal ngadto sa Sto. Niño Shrine sa may Brgy. Libertad ning siyudad kondiin personal kining gidawat nila parish priest Fr. Ruel Lasco ug iyang staff nga si Aisa Bacalso.
Dako ang pagpasalamat ni Fr. Lasco ngadto sa Bombo Radyo nga usa sila sa nakabenepisyo niini og misaad nga paningkamutang ma-apod kini sa ilang mga parokyanong nanginahanglan niini alang sa ilang sakit.
Lakip sa ilang nadawat nga mga tambal ang duha ka botelya sa Flaqex suspension 5ml; lima ka botelya sa tag-12ml nga Mycosyl suspension; onse ka pads sa tag-100ml nga Doxycycline; 80 ka botelya sa tag-500mg nga Metmorfin; 24 ka botelya sa tag-30mg nga Gliclazide; 106 ka mga botelya sa tag-100mg sa Retracef. Anaa pa ang 46 ka mga botelya sa tag-20ml nga Remedflor; 288 ka mga botelya sa tag-5ml nga Ammuno-Zinc syrup; 16 ka botelya sa tag-250mg nga Dialox; usa ka botelya sa Tricor; og 34 ka kapsula sa Glitaz.
Susamang pagpasalamat ang gibungat ni Fr. Dennis Presco – parochial vicar sa St. Joseph Cathedral ning siyudad sa Butuan nga apil sila sa benepisyaryo sa mga tambal nga gitunol ning sibyahan. Ang maong mga tambal, mao usab ang nabilin human ang malampusong Bombo Medico 2019 nga gipahigayon sa provincial Capitol covered court niadtong Hulyo 14.
Lakip sa ilang nadawat ang 25 ka kahon sa tag-500mg nga Metformen; 36 ka kahon sa tag-30mg nga Gliclazide; 45 ka mga botelya sa tag-100ml og 5ml Cefixime Retacef suspension; 45 ka mga botelya usab sa tag-20ml nga Cefaclor og 195 ka mga botelya sa tag-55mg og 5ml nga Ammuno-Zinc syrup. Sigon ni Fr. Presco, dakong tabang na kini sa mga parokyanong manginahanglan niini ilabina kadtong wala’y ikapalit og tambal alang sa pagpa-ayo sa ilang balatian.
Samtang gibutyag usab ni Dioscora Garcia sa Integrated Midwives Association of the Philippines kon IMAP nga dako og matabang ang maong mga tambal ngadto sa mga yanong katawhang matunulan niini ilabina nga mao kini ang gigamit sa pagtambal sa mga komon nga balatian.
