BUTUAN CITY – Lima ka mga Vietnamese nationals ang nasikop sa mga otoridad human gi-hold sa duha ka managlahing okasyon dinhi sa dakbayan sa Butuan.
Una niini natigayon sa may Grand Palace Hotel sa Brgy. Imadejas ning siyudad human gi-hold sa on duty nga security guard pasado alas-11:30 kagabii ang tulo ka mga mag-check in unta nga mga Vietnamese.
Naila kining sila Nguyen Thi Chung, 40-anyos, babaye, residente sa Hanoi; Diep Thi Bich, 45-anyos, babaye, residente sa Hoa Binh og Vu Van Trang, 33-anyos, lalaki, residente sa Nam Dinh parehong sakop sa Vietnam.
Migawas sa imbestigasyon sa Butuan City Police Station 1 nga nakita sa gwardiyang si Daniel Arandilla, ang kadudahang pinutol na nga mga forest products rason nga mitawag kini sa police station.
Sa ilang pagresponde, nasuta nga mukabat sa 2-kilos nga Agarwood kon Lapnisan ang dala sa mga suspek kansang balor, padayon pang gisuta.
Nasayrang gi-hold gilayon ang tulo human nasuta nga naturally-grown trees ang maong pinutol nga mga kahoy nga gisulod sa bag og gidili ang pagdala niini sa usa ka indibidwal kung wala’y permit gikan sa Department of Environment and Natural Resources kon DENR.
Apil sa nakuha gikan sa ilang posisyon ang dul-an 1.8-milyunes pesos nga salaping cash nga gitu-uhang ibayad sa maong mga kahoy.
Laing duha ka mga Vietnamese usab ang gi-hold sa Bancasi Airport kaganinang alas-singko sa sayong buntag og padayong gi-imbestigahan human narekober gikan sa ilang posisyon ang susamang mga kahoy nga gisulod sa 17 ka mga bags.
Nakuha usab gikan sa posisyon nila To Quoc Vo og To Tien Phat, 21-anyos, red corals nga mitimbang og usa ka kilo og tunga og 4-milyunes pesos nga salaping cash.
