BUTUAN CITY – Malampusong narekober sa mga sakop sa 30th Infantry ‘PYTHON’ Battalion ang usa ka arms cache sa bukirang bahin sa Sitio Tumay-as, Brgy Ferlda, lungsod sa Alegria, Surigao del Norte.
Apil niini ang upat ka AK 47 rifles uban sa upat ka mga magazines nga gipanag-iyahan sa mga sakop sa Sandatahang Yunit Pang Propaganda (SYP) 16C, Guerrilla Front 16 (GF16), North Eastern Mindanao Regional Committee kon NEMRC.
Sa eksklusibong pakighinabi sa Bombo Radyo Butuan kang Lt Col Allen Raymund Tomas, commanding officer sa 30th IB, gibutyag niining natud-an nila ang maong mga armas human kini gikumpisal sa mga kanhi rebeldeng mitahan sa ilang brigada.
Gidugang sa opisyal nga apil sa nanag-iya sa maong mga armas mao ang mga kanhi rebeldeng napatay sa engkwentro o kaha kadtong nag-lie low una ingon man mibiya na sa walhong kalihukan.
Aminado ang opisyal nga functional pa ang maong mga armas.
