BUTUAN CITY – Gihatagan og hero’s welcome sa Police Regional Office kon PRO-13 ang pag-abot sa patay’ng lawas ni Patrolman Ronald Napalan, sakop sa kapulisan sa Tubod, Surigao del Norte kaganinang buntag.
Ang maong rookie cop napatay atol sa engkwentrong natigayon sa hini-usang pwersa sa 29th Infantry Brigade, Philippine Army apil na sa 1302nd Maneuver Company og Technical Support Company sa Regional Mobile Force Battalion 13 batuk sa mga rebeldeng New People’s Army kon NPA.
Natigayon kini sa bisinidad sa Sitio Lobo, Brgy. Mahaba, Cabadbaran, Agusan del Norte niadtong Sabado sa alas-10:30 sa buntag.
Sigon ni PLCol. Christian Rafols – tigpamaba sa Police Regional Office kon PRO-13, miresponde ang maong pwersa sa nadawat nilang impormasyon kalabot sa presensya sa mga rebeldeng nangilkil matud pa sa mga residente sa maong lugar, resulta sa natigayong engkwentro. Ang igo sa ulo maoy mikutlo sa kinabuhi sa maong pulis kinsa kagahapon pa sa hapon napanakaog tungod sa kalayo sa maong lugar nga lisod pa ang terrain.
Gi-andam na ang mga kasong ipasaka batuk sa mga rebeldeng anaa nag-operate sa lugar nga ilang nahitabuan.
