BUTUAN CITY – Gi-angkon sa rebeldeng New People’s Army kon NPA nga sila ang milikida kang CAFGU member Felipe Amado, 42 anyos, alyas Iping, usa ka Manobo residente og nadestino sa Barangay Lydia, lungsod sa La Paz, Agusan del Sur.
Kini ang gibutyag ni Ka Omar Ibarra, nagpa-ilang tigpamaba sa NPA-Western Agusan del Norte-Agusan del Sur kon NPA-WANAS sub-regional command sa eksklusibong pakighinabi sa Bombo Radyo Butuan.
Gipasabot niini nga dako og kalapasang nahimo si Iping ngadto sa ilang walhong kahugpungan og sa katawhan.
Nasayrang CAFGU member na kaniadto ang biktima og mitahan kini ngadto sa NPA niadtong tuig 2009 dayong saad nga dili na mubalik pa sa pagserbisyo sa gobyerno.
Apan wala matud pa niya kini tumana paglabay sa pipila ka tuig dayong balik pag-CAFGU og nag-abusar matud pa sa mga tawo rason nga ila kining gilikida.
Ang orihinal matud pang plano mao ang pagbanhig kaniya apan tungod kay mi-uban kini sa panon sa mga sibilyan, rason nga gipara na lang nila ang gisakyan niini diin didto na siya gihukman og kamatayon atubangan sa kuyog matud pa niyang duha ka mga barangay kagawad og usa ka sibilyan.
