BUTUAN CITY – Daghan ang dili makatuo nga ang mga food stalls sa Japan mamahimo nang ipadagan sa mga iro og usa ka ehemplo niini ang “Dog’s Sweet Potato Shop”, usa ka gamay nga kiosk nga namaligya og roasted nga kamote sa Sapporo, Japan nga gipadagan sa 3-anyos nga iro nga Shiba-Inu ang kaliwat.
Unang nasayran sa Japanese Twitter user nga si @hina_shii_ver2 ang “Dog’s Sweet Potato Shop” sa sayong bahin pa lang ning bulana dihang giteksan siya sa iyang bana kalabot niini.
Sa sinugdanan wala siya mutuo sa pagtuong gara-gara lang kini hangtud sa iyang pagsusi, nasuta nga tinuod diay kini.
Dihang iyang gi-post ang pipila ka mga hulagway og videos sa pinasahing food-stall , dali gilayon kining nag-viral ilabina nga seguradong wala pa’y nakita ang mga tawo nga usa ka iro ang nagpadagan sa usa ka negosyo.
Ang buutan nga Shiba-inu maoy nagpadagan sa iyang kaugalingong roasted sweet potato kiosk kansang pangalan mao ang Ken-Kun –ang pangalan sa 3-anyos nga Shiba-un dog.
Tungod kay ang iyang shop self-service man, ang iya lang trabaho mao ang pagpa-cute alang sa mga customer og sama sa imong Makita sa mga hulagway, maayo siya sa maong trabaho, ang pagpa-cute.
Ang roasted nga kamote giputos sa heated container nga gi-display sa gamay nga bahin sa kiosk, aron ang mamalit dili na maglisod pagkuha niini.
Sundon sa mga customers “honor system”, kondiin bahala na silang mutunol og 100 yen kon balor 50-pesos nga kwarta diha sa money box alang sa matag-kamote nga ilang kuhaon, kansa base sa dagan sa negosyo sa iro, epektibo.
Posible matud pang wala’y maka-ako pagkawat niini tungod sa pinasahing nagpadagan og ka-master usab ni Ken Kun nga magpa-cute sa mga manglabay.
